ماه لر آیم نادره


ماه لر آیم نادره یوسک بدیعی استعداد صاحیبه سی ، دلکش ،صمیمی ،معرفت پرور اوزبیک اعیالی دیر.

او اویسی ، محزونه ، دلشاد برنا،عنبر آتین کبی اوزبیک ممتاز شاعره لری صفینینگ سرداری بولگن.

Mohlaroyim Nodira

شاعره 1792-ییلی اندیجان حاکمی رحمان قلی بیی عایله سیده توغیلدی.اوتکر زهنلی ماه لر آیم آتین آیی قولیده تعلیم آلدی، خصوصی مطالعه بیلن شغل لندی.

شرق ممتاز ادبیاتینی جدی اورگندی ،شعرلر مشق قیلیب ،یاشلیگیده یاق شاعره صفتیده تنیلدی.

اونینگ اولغه یش ییللری ادبیات اهلی دوره سیده کیچدی.1808-ییلی ناربوته باینینگ اوغلی عمر خان بیلن عایله قوردی .1810-ییلگچه مرغیلان ده ،اوندن کیین عمرینینگ آخریگچه قوقانده یشه دی .ماه لر آیم محمدعلی خان و سلطان محمد خان اسملی اوغیل لر تربیه له دی.امیری تخلصی بیلن عجایب شعرلر یره تگن امیر عمر خان 1822-ییلده وفات ایتب،عمر یولداشی نادره نی یلغوزله تیب کیتدی.

ایریک شاعر امیری بیلن بیرگه اوتکرگن حیات دوری نادره قسمتینینگ بختلی آنلرینی تشکیل ایتدی.بو دور ده او توموش لزتلریدن بهره مند ایدی.فرزند تربیه له دی ،طبیعت و حیات گوزه لیک لرینی تره نم ایتگوچی عجایب شعرلر یازدی.بیراق امیر عمر خان نینگ ناگاهانی اولیمی توپیلی نادره نظمیده گی شاد لیک و بخت تویغولری اورنینی الم و ایریلیق اضطرابلری ایگه له دی.حقیقی عشق تصویری کوچیدی ، تصوفی رمزو تیمثال لر کوچیدی.ساغینچه و ارمان ناله لری رواج تاپدی. ماه لر آیم بدیعی ایجاد بیلن استای دل شغل لندی .نادره ،محزونه ، کامیله تخلص لری بیلن شعرلر یازیب ،مکمل دیوان یرهتیشگه میسر بولدی.

امیر عمرخان وفاتیدن کیین نادره دولت ایشلریده هم باش-قاش بولدی ،بو باره ده اوغلی محمدعلی خان گه حامیلیک قیلدی .او اجتماعی عمرینی ایزگو ایشلرگه سفربر ایتدی.شاعره نینگ منه بو دانا غزل لری اونینگ اجتماعی فعالیتیده اوزینینگ عملی افاده سینی تاپدی.

خوشا عاقل کی،ایلب یخشی لیک بنیادینی محکم،

اوتر ده ی روفانی دن اوزینی ایلب.

نادره ایزگو ایشلر بنیاد ایتدی و اوتر دنیاده یخشی نام قالدیردی.ماه لر آیم نادره اسلام دینیگه صمیمی اعتقاد قویگن ،تصوف مسله گیگه مهر باغله گن کامیل مسلمان شاعره ایدی.او اسلام و تصوف یونه لیشیده کته کتاب لر یره تمه گن ،تفکور تاریخیده ایز قالدورگیلیک کشف و کرامت لر کورستمه گن بولسه ده ،اجتماعی فعالیتینی بو ایزگو یولده شو قدر فدایی لیک بیلن سفربر ایتدیکی ،اونینگ سعی حرکتی بیلن دین همده ملت تکاملی اوچون طبعی شرایط وجودگه کیلدی .شاعرنینگ عملی فعالیتی نظری و معرفی یوتوقلر عاملی بولدی .

نادره اوشبو تاریخی خدمتلرینی دیوانی دیباچه سیده افتخار و قانیقیش حس لری بیلن یازه دی.“علمای دین رواج لریگه امداد یتکوردیم،تا شعری شریف رواج تاپدی،زهد اهلیگه اخلاص و عقیده ت ظاهر قیلدیم ، تا دین و ملت کاملتاپدی. فضل و دانش قبله سیگه شفقت و مرحمتدین اونچه عنایت لر کورگزدیم کیم “ اعتبار درجه سیگه تره قی قیلدیلر.ساحل و گدا لرنی طلب لریگه ایتکوریب ،کرم و احسان ایشیکیدین نا امیدیوبارمدیم. موشفع شریفی و کتب دینی و رسیلی یقینی کوپ یازدوردیم .برچه سینی خالصاالله وقف قیلدیم ”. بونده ی افتخار اطهاری نادره غزل لریده هم صدا بیره دی.

دین نادره دن کمال تاپدی،

اقبال رفیق و ملکی آباد.

یوقاریده گی سینگری ثواب ایشلرینی عمل گه آشیریش نادره فعالیتینینگ قطعی شاعریگه ایلنگن ایدی . اونینگ:

ایله گیل آباد توفیق و عدالت ملکینی ،

کامیله ،مولا یولیده همتی مردانه توت

بیتی مزکور شاعرنینگ بدیعی افاده سیدیر.

اما ناساز اجتماعی محیط نادره گه وفا قیلمه دی .جمعیتده گی ایاوسیز کوره ش ماه لر آیم سینگری نادر صنعت کارلرنی اوز منفعتی یولیده قربان قیلدی .عقل و دانش و ایزگو فضیلت لر صاحبی نادره ی دوران نامی بیلن شهرت قازانگن شاعره 1842 -ییلی قوقان باسیب آلینگن پیتده امیر نصرالله تمانیدن اوغیل لری محمد علی خان ، سلطان محمد خان ،محرم لری خوش حال بی بی ،ناربی بی ، عایشه بی بی لربیلن بیرگه قتل قیلیندی.

نادره

screenurl

ماه لر آیم نادره :

جلوه کورستدی چو اول سروی دل آرا باغ ارا،

چشمه ی قمری بولدی بیر چشم تماشا باغ ارا.


سورمگون چشم نظر سالدی گلستان اهلینه ،

حسرتینگدین قالدی نرگس کوزیشهلا باغ ارا.


عارضی گلگون ایله قیلدی چمن ساری خرامان،

گل یقاسین چاک ایلب بولدی رسوا باغ ارا.


سرو گل رخساریم ایله بزم عشرت دیب بهار،

سرو بیرله گلدین ایتدی جام مینا باغ ارا.


لاله ینگلیغ داغ بولدی گل جمالی رشکیدین،

داغلیق گل لردین اولدی سیر صحرا باغ ارا.


نخل قیلدی قدی خجلتیدین بولدی سؤ سرو روان،

ایلدی فواره لر جاری سرا پا باغ ارا.


سیر اوچون قویغی قدم دیب سبزه ی خوابیده دین،

هر طرف بیر فرش مخملدور مخیا باغ ارا.


کوردی اول سرو دل آرا قامتی موزونینی،

سرو قدین قیلدی قمریلر تمنا باغ ارا.


سین بوکون خندان سن ای گل ”نادره ”دلدارسیز،

یغلماقدین دور بولوت لردیک محیا باغ ارا.

تیارلاوچی داکترعزیزالله فاریابی

بىر ئىنكاس

  1. […] yo’rimlar ماه لر آیم نادره « گونی تورکستان on Mohlaroyim Nodiraتاریخیمیزنینگ قاره داغ لری « گونی […]

یوروم یازینگ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ئۆزگەرتىش )

Google photo

You are commenting using your Google account. Log Out /  ئۆزگەرتىش )

Twitter picture

You are commenting using your Twitter account. Log Out /  ئۆزگەرتىش )

فەيسبۇك سۈرىتى

You are commenting using your Facebook account. Log Out /  ئۆزگەرتىش )

Connecting to %s

%d bloggers like this: