صدرالدین انتظار جوزجانلی

حاجی عبدالرحیم اؤغلو صدرالدین ”انتظار“، ۱۳۲۲نچی هجری قویاش ییلیندا، سرپل کئنتی نینگ عربخانه گذرینده بول آجونغا کؤز آچمیشتیر. اؤ، اؤزونونگ یاراتتیغی پیشیغ ویوکسئک آنغلاملی قؤشوغلاری یانیندا آوغانیستان رادیو وتیلویزییونی آرقالی تارقاتتیغی تاتیغ سئسی بیرله اؤقودوغو کویلری بیرله ده، ییللاردان بئری آوغانیستانلی تورکلرآراسیندا بیرسابلیغ شاعر وتاتیغ سئسلی ییراغو (قؤشوغچو، موسیقیچی) تانیلیب، سئودئکلرینینگ کؤنگلونده شین (تخت) قوروب کئلمئکته دیر.

انتظار ایلک مکتبنی سرپل ده بیتتیردئکتئن کئیین، بیلگیسینی آرتیرماق اوچون مزارشریف یؤلوغا توشوب، اؤردا کی اسدیه دارالعلومی ده سئکیزییل اؤقودوقتان سؤنغرا ۱۳۴۴نچی ییلدا اؤگره تیمینی آداغلاب سرپل گه قایتیب کئله دی.

شاعریمیز مدرسه ده اؤزچاغینینگ اونلو بیلگه لرینده ن تانیلمیش حرمتلی مولوی محمد حنیف ”حنیف“ نینگ بیلگیلرینده ن آسیغلاندیغینی بیلدیریرکئن، کئندینی قاضی ضیأالدین ”ضیا“، الحاج قاری محمد عظیم ”عظیمی سرپلی“ بیرله استاد غلام محمد ”خدیم“ نینگ شاگردی دئب ده تانییدی.

صدرالدین انتظار، یالنغوز اؤزبئگ تورکچه سیده تئگیل دری تیلیده ده شعرلریازمیش، آنجاق ۱۳۸۶نچی ییلدا اؤنونگ تورکچه شعرلرینده ن ”گلشن ایچره“ آتی بیرله یوزاوچ قؤشوغو ۱۳۳بئتده میرزا اولوغ بئگ مطبعه سینده باسیلیب یایینلانمیشتیر.

سؤنغ ییللارغاچا ”شمال حوزه“ سینینگ شیبیرغان داکی قارایاغ وگاز ریاستینده کنترول مدیری قوروغا ایشلئب کئلگئن انتظار، حاضر سرپل ده ائمگئکلی (متقاعد) اؤلاراق یاشاماقتادیر.

قؤیودا انتظارنینگ یوقاریداسؤیله دیگیمیزبیتیگیده ن بیرنیچه اؤرنئک کئلتیره میز:

ابن یمین غزلیگه مشاعره

باریچه

مرد ایگیت لرگه قیلای خدمت توانیم باریچه

صحبت نامرد دئن قاچسام که جانیم باریچه

قیغو و آزاردئن بیزار من ای دوست لر

یخشی لیق دئن سؤزلایین مئن تا زبانیم باریچه

جهل آسیبی بلا دورقاچغیل اوندن زینهار

مئن هم اونگه قرشی من تا قطره قانیم باریچه

دشمن ناکاره دئن یؤق دور ازل دئن قؤرقیشیم

مئن کوراش میدانیده بارمن نشانیم باریچه

صلح وبردم لیک قویاشی چیقسه اول دم اولکه غه

یارقونی دئن کوچ آلور قلبم ایشانیم باریچه

گر رقیب شوم بؤلدی عشق یؤلیده خطر

ایستاگیم وصلیده دور تا آب ونانیم باریچه

عزت دنیا زروزیور گه باغلیق انتظار

نئچه لر حرمت قیلور ینگی چپانیم باریچه

زاغ و زغن

کئلدی طالب لر، باسیب آلدی همه یئرنی به دو

نئچه گه تیترتمه توشتی، قنچه هم بؤلدی ینو

کاکل و کلاه آلیندی باشیمیزدن جبر ایلن

تؤربه سقال لر قؤیوب بؤلدیک همه مثل ببو

شهر ایچره خاک مرده سئپیلیب بؤلدی سکوت

چهره میزگه گرد پیری اؤلتوروب همچون قیرو

بلبل شوریده اؤرنیغه قؤنوب زاغ و زغن

نوحه ی طوطی و قمری باغ ارا دور ناشنو

قهرمان لیک شان وشوکت یؤقیلیب قالدی بوگون

پهلوان باتورلرئمیز جای لری بؤلدی قمو

شاعر و فرهنگ اهلی یاشونوب گاهی قاچیب

نئچه سی قیلمی گناه یاولر قؤلیده دیر گرو

قنچه بیر برنا ایگیت لر تهمت آتیغه اوچوب

قمچی و شلاق لار تئگدی باشیگه یا کسو

نغمه ی نای و دوتار و ساز ویلون و رباب

اولکه ده خاموش بؤلدی تیش گه کؤرمس دور بیرو

جان قمه دور یا مگر تب توشتی مردم جانیغه

یاشونوب قاچر که گویا توشسه جنگل گه الو

تا که ائرکین لیک قویاشی چیقمسه مشرق ارا

شادلیک دورینی کؤرمی حالیمیز بؤلمس دیو

دوکتور ع ، م ، تاشقین