غربت نوا لریدن: شعرلر

غربت نوا لریدن: شعرلر

سین بيلن بار اعتباريم ای وطن،

سين بيلن بار اقتداريم ای وطن.

 

 

سمرقند

 بوتون محبتيم، دل توله مهريم،

سېنگه تارتيق- ساوغه قيلديم سمرقند.

اوزاق اوتميشيم نينگ بويوک ليگينی

سينده ايکن کورديم، بيلديم سمرقند.

سېن محبت يورتی – سيوگی مسکنی،

سۉنگی يوق داستان سين- «افسانه شهريم»،

قۉيينينگده نېچه کون بولديم قوانديم،

ابدی قوانچيم، جانانه شهريم.

 

يشيل سياره نينگ يارقين يولدوزی،

گوزه ل ليک رشک ايترسېنگه گل ديار،

«يېر يوزی صيقلی»- يېريوزی فخری،

سېن کبی کېلينچک شَهَرقيده بار؟

 

سېن بیلن باشله‌نرتأریخ دېیدیلر،

سېن قدیمی مسکن- سین نوقیران يورت.

اوزاق عمر کوردينگ، هلی هم ياش سن،

ای ایسکی کاشانه، دارالامان یورت.

 

امام البخاری قوينينگده ياتگن،

جهانگير تيمورنينگ دارالقراری.

سمرقند – اولوغلر منزل مکانی،

اولوغ بيک – اولوغ‌‌نينگ سينده مزاری.

        سمرقند شهری

           2006- کوز 

---

غربت نوالریدن :

يورتيم بهاری

صبا کيلتيرمه دينگ بير يول خبر يورتيم بهاريندن،

قاره کوزلر قانی  بيرله بويه‌لگن  لاله  زاريندن.

سيپيب اوت کوزلريم يمغورينی، هرباره اوتگنده

بشاغی قانگه چه يقلگن، اوزوم باغلر کناريندن.

ايسر بولسنگ اگر ده‌يديب اونيب اوسگن دياريمده،

طواف ايت مين تماندن هم، عزيز لرنينگ مزاريندن.

نی تانگ کيم تانگيدن بيزگه گهی بيرخوش خبرکيلمس

کيتور احوال، قاره کونلر، قاره تونلر دياريندن.

قورودی چشمهء چشميم توکيب حسرتلی ياشلرنی،

ييترمی بير نيمه بيزگه بو غربت انتظاريندن ؟

ساغينچيم ساوغه سين کويله حزين مونگلی نوا بيرله،

قدردانلرگه کيم ديرلر، اولر ايرلر تباريندن.

قنی تاپسم کوزيمگه سرمه ايتسم مين قيراتلرنينگ

تياغيندن ساچيلگن توتيا، گرد و غباريندن.

                                پشاور- پاکستان                    

             2001 بهار

 

---

حیات؟

کوزیمده‌گی یاش ؛

قه‌یسی بیرکون،

کیپریگلریمدن،

زلال تامچی‌ بولیب؛

توشه‌دی،

 ییرگه!

                       کابل . ۱۳۸۷/ دلو / ۳

---

غربت نوا لریدن:

بو قرا تون بغريده

غيراولديرمسدن اول، بيزنی يار اولدورگوسی،

غير قهری بيرله، اول مهرايله زاراولدورگوسی.

تانگ اياقچيسی اوزاتگونچه بيزه بير جرعه می،

بو قرا تون بغريده،  بيزنی خمار اولدورگوسی.

نی عجايب فتنه لر قوزغلدی دوران ايچره کيم،

بو رعيت لشکرينی، شهريار اولدورگوسی.

ييتگينيمچه مين اميديم شاهدی نينگ وصليگه،

هجرمهلک واديسيده انتظار اولديرگو سی.

ياو و يات اوترو کيليب يينگالمه‌دی بيزنی، ولی

آرقه دن اورسه قيليچ خويش وتبار اولدورگوسی.

ايتمه جانيم قصدينی جانينگه قصدايلر بيراو،

تانگ ايمس اورمان ارا شيرنی شکار اولدورگوسی.

بی وطن ليک دردی کوندن کونگه آرتيب باره دير،

ايندی بو غربتده نيله‌ی روزگار اولدورگوسی.

نی اماندير بيزگه ياو دين نی امان اول ياردين،

يار پنهان اولديرر غير آشکار اولدورگوسی  

     پشاور - پاکستان

       2000 آگست  1 

---

 زمانداشيم 

چوقَيلرده چوککن آپاق قلين قار،

يولدوزلی تونلرده،

آيلی تونلرده،

نه قدر مصفا، نه قدر گوزه‌ل.

 

آه، نيته‌ی – نی قيله‌ی،

زمانداشيم‌نينگ،

چوقيده‌گی قارديک ساچلری آپاق،

بولدی و بولمه‌دی مصفا کونگلی،

يولدوزلی تونلرده،

اوشه ييراقدن،

جلا بيريب تورگن پاکيزه قارديک.

                             کابل

---

آرزولریم 

تولقینینگدن حیات قلقینر،

آرزولریم چیکسیز عمان سن.

دل ملکیده فتنه لر سالگن،

باش کوترگن طرفه عصیان سن.

 

سان سناقسیزیولدوزلی کوک سن،

بارسه کیلمس یول موسن گویا.

قبقرانغو ظلمت بغریده،

ایمس موسن بیر توینوک ضیا؟

 

آسمانلرگه اوچه سن تینمَی،

آرزولریم سیمیر قوش بولیب.

خیالیمدن اوته سن دایم،

مثالی بیر تونگی توش بولیب.

 

باشگه بارمس اوزاق یول سن و

ییتیب بولمس منزل – مکان سن.

شاهلر اوچون تخت و سلطنت،

گدالرگه بیر بورده نان سن.

 

آرزولریم قوریمس بولاق،

آرزولریم تولقینلی دریا.

مینگ بیر یوسف تعبیر ایتالمس،

آرزولریم سحرلی رویا.

                 

---

وطن

سین بيلن بار اعتباريم ای وطن،

سين بيلن بار اقتداريم ای وطن.

سينده قالدی آبروييم عزتيم،

سينده قالدی رنگ روييم همتيمٍٍٍ.

سين سيزين غربتده کيم بولديم بوکون،

سين سيزين گويا تيريک اولديم بوکون.

نی قيله ی غربتده راحت يوق ايکن،

بيرنفس بيردم فراغت يوق ايکن.

توزيگن توپراغلرينگنی زاری مين،

يم يشيل اوتلاغلرينگنی زاری مين.

بونده موسمدين حلاوت کورمه ديم،

کيچدی آی و ييل طراوت کورمه ديم.

بونده نی قيش نی بهارو يازی بار،

بونده بلبل نينگ نی خوش آوازی بار.

قيشی يازو يازی دوزخدن يمان،

يا که غربتده قيلورمن بو گمان.

قيشده گی قارينگنی ساغينديم وطن،

هرنی که بارينگنی ساغينديم وطن.

گرميسربولسه قوينينگه باريب،

توپراغينگنی کوزگه سورتسم يالباريب.

سين بيلن بولگنده قدرينگ بيلمه ديم،

بو گنه بولدی ثواب ايش قيلمه ديم.

گرگدا مين سينده بولسم شاه مين،

يوقسه سين سيز مين گدا آگاه مين.

نی قيله ی يورتيم بوکون غمخانه دير،

بونده گی ايل بيز لره بيگانه دير.

نی ديبان شرح فراقينگنی يازه‌ی،

يا چيکيب اونلر فلکدين اوتکزه‌ی.

قه يسی بير غمدين شکايتلر قيله‌ی،

قه يسی ماتمدين حکايتلر قيله‌ی.

شعر ايمس دور بو جگر نينگ پاره‌سی،

دردلی ايل کونگلی نينگ قان ياره‌سی.

استعاره مونده يوق کوز يا شی بو،

ينگی بير غمنامه نينگ سوز با شی بو.

اسلام آباد – پاکستان ۲۰۰۰ سرطان