کل اۉغلان و بای قیز

عبدالرحیم معصومی

کل اوغلان آتیده گی کتابیم دن

 بیر بار اېکن- بیر یۉق اېکن اولکه لر نینگ بیریده کل اۉغلان دېگن بیر کمبغل ییگیت بار اېکن. بو کل اۉغلان آنه سی بیلن بیرگه یشر اېکن. کل اۉغلان کېچه وکوندوز تاغلردن تېرگن اۉتینینی ساتیب کون  کېچیرر اېکن. کونلردن – بیر کون کل اۉغلان اۉتین گه کېتگنده کېچ گچه قالیب کېتیبدی. اۉتین نی یوکلب  کېله یاتگنیده  جینلرنی اۉیین اۉینب اۉلتیرگنلرینی  و آره لریده بیر قیزنی ییغلب اۉلتیرگنینی کۉریب یانلریگه بارگن اېکن. کل اۉغلان جینلرگه :

- انس می سیز؟ جین می سیز؟ دېب سۉره بدی.

- جینلر اېسه بیزلر جین میز، سېن کیم سن؟ دېب جواب بېریبدی.

- کل اۉغلان مین نې انس من و نې جین من آدمزادنی باله سی بۉله من دېگنیده قیز کل اۉغلانگه :

- اکه، بولر جین لردیر، مېنی اۉییمدن آلیب قاچدیلر، التماس مېنی بولرنینگ قۉلیدن قوتقرینگ، دېب ایتکن اېکن. 

کل اۉغلان قیزنی بو سۉزلرینی اېشیتیب ، بیر پلان بیلن جینلرگه :

- مېنینگ قۉلیمده سیزلرنی یۉق اېته یاتکن طلسم بار. اگر قیزنی قۉیوب یوبارمه سنگیز طلسم نی چیقاریب سیزلرنی یۉق اېته من، دېبدی.

جینلر:

- سېن کیم سن؟ سېنینگ آتینگ نیمه ؟ بیزنینگ طلسم سېنینگ قۉلینگه قنده ی قیلیب بۉلیشی ممکن، دېب، سۉر ه بدی.

کل اۉغلان:

- مېنینگ آتیم کل اۉغلان. مین اولکه نینگ اېنگ بویوک فالچیسی و جادوگری من. سیزلر مېنی قنده ی تانیمه یسیزلر دېب، قۉرقیتکن اېکن.

جینلر اېسه کل اۉغلان نینگ بو سۉزلریدن قۉرقیب بای قیزنی کل اۉغلانگه تاپشیریبدیلر.

کل اۉغلان بای قیز بیلن اۉییگه کېلیبدی.

کل اۉغلان نینگ آنه سی یاتمه ی اۉغلینی کوتیب اۉلتیرگن اېکن. کل اۉغلان نینگ یانیده قیز نی کۉریب اچیغی کېلیبدی.

بای قیز کل اۉغلان نینگ آنه سی نینگ اچیغینی ترقه تیش اوچون :

ای آنه جان! کل اۉغلانگه اچیق قیلمنگ. کل اۉغلان مېنی جینلرنینگ قۉلیدن قوتقزدی. مېن بو خدمتینی ادا قیله آلمه یمن. دېبدی.

کل اۉغلان نینگ آنه سی :

خۉش کېلدینگ قیزیم، کېل شو یېرده اۉلتیر، سېن مهمان سن. مهمان تېنگری نینگ عزیزی دیر،دېبدی.

بای قیز کل اۉغلان نینگ اۉییده بیر نېچه کون قالیبدی. کل اۉغلان نینگ کمبغللیگینی کۉریب خفه بۉلیب، کل اۉغلان نینگ آنه سیگه:

آنه جان، مېن اوچون جوده کۉپ اوریندینگیز. زحمت لرینگیزاوچون رحمت سیز گه. اېندی مېن کېته من و اجازه نگیز بۉلسه کل اۉغلاننی بیرگه آلیب کېته من، دېبدی.

يۉق، بۉلمه یدی مېن یالغیز قاله من.

آی قیز : اما اونگه تحفه بېریشیم کېره ک.

خاتین : قنده ی تحفه بېره سن؟

آی قیز : سۉنگره کۉره سیز دېبدی.

خاتین : میلی بارینگلر.

کل اۉغلان آنه سی نینگ قۉلیدن اۉپیب خداحافظ لیک قیلیبدی.

خاتین: تېزراق قه یتیب کېل اۉغلیم کۉزیمنی یۉلگه قۉیمه، دېبدی.

کل اۉغلان بیلن آی قیز یۉلگه توشیب کېتیبدی و یوره – یوره بیر سرایگه باریبدیلر. سرای نینگ اېشیگینی اوریبدیلر. ايشیکنی  بیر بای آچیبدی. بای آی قیزنی کۉرگنیدیک سېوینچ بیلن قیزیم خۉش کېلدینگ سېنی کۉرر کونیم هم باراېکن دېب، قوچاقلب آلیبدی.

آی قیز، بای نینگ قیزی اېکن.

بای کل اۉغلان نی کۉریب خۉش بولیبدی. بای نینگ اۉغلی یوق اېکن. کل اۉغلاننی اۉزی گه اۉغیل قیلیب آلماقچی بۉلیبـدی. آی قیــز اېســه آته سیگه جینلرنی قۉلیدن قوتقریش اوچون کل اۉغلان کۉره شی دن بحث اېتیب، اونی مقته بدی.

بای کل اۉغلانگه :

اۉغلیم سېنگه رحمت دېب منتدارچیلیک بیلدیریبدی. مېنینگ اۉغلیم یوق. سېن بیزنینگ اۉغلیمیز صفتیده بیز بیلن قال و سېنی بیر گوزل قیزگه اۉیلنتیره من دېبدی.

کل اۉغلان :

سیزگه رحمت. اما مېنینگ بیر غریب آنم بار. آنم نی یالغیز قۉیالمی من. آی قیزنی سیزگه تاپشیریب اۉییمگه کېته من، دېبدی.

آی قیز هم کل اۉغلانگه : کېتمه کل اۉغلان بیر نېچه کون قالیشینگ کېره ک. سېن مېنینگ حیاتیمنی قوتقزدینگ سېنگه تحفه تقدیم اېته من. بیر نېچه کون قال لطفاً، دیبدی.    کل اۉغلان اېسه یواش سېس بیلن بۉله دی، بیر نېچه کون قاله من، دېبدی.

بای هم کل اۉغلاننی تانیشتیریش همده قیزی نی جینلرنینگ قۉلیدن قوتقزگنی اوچون بیر کتته محفل اویوشتیریبدی. شهرده گی بوتون بای و پادشاه لرنینگ عاېله لری بیلن سراییگه دعوت اېتیبدی. اېرته  گه آقشم بوتون مهمانلرمحفلگه کېلیشیبدی. آی قیز کل اۉغلان نی مهمانلر گه تانیشتیریب  مهمانلرگه قره ب،  کل اۉغلان بیزلرگه بو آقشم  قۉشیق  ایته دی دېب، کل اۉغلاندن بیر قۉشیق ایتیشنی التماس  اېتیبدی.

 کل اۉغلان: مېن قۉشیق ايتیش نی بیلمه یمن.

آی قیز: بیله سن مېن سېسینگنی اېشیتکن من،  دېگنده،  کل اۉغلان بوله دی  بیر قۉشیق ایته من دېب  بیر نېچه قۉشیق ایتیبدی  و  کل اۉغلان نینگ سېسیدن همه نینگ خۉشی کېلیبدی. حتی پادشاه نینگ قیزی بېگم کل اۉغلانگه عاشق بۉلیبدی.

پادشاه نینگ قیزی بېگم کل اۉغلانگه تورموشگه چیقیشنی پېشنهاد اېتگنیده کل اۉغلان اېسه مېن بیر کمبغل کل اۉغلان من، سېن اېسه پادشاه نینگ قیزی سن. مېن سېنینگ ماس اېمس من، همده  قیشلاغده مېنینگ بیر قری آنم بار آنم نی یالغیز قالدیره آلمه ی من .اجازتینگیز بۉلسه مېن آنم نینگ یانیگه کېته من، دېبدی.

بېگم : سېن کمبغل کل اۉغلان بۉلسه نگ هم مېنینگ کۉنگلیم نینگ پادشاهی سن. کېت قیشلاقدن آنه نگنی هم کېلتیر اونی هم یانیمیزگه آلیب بیرگه حیات کېچیره میز دېب، کل اۉغلاننی راضی قیله دی.

کل اۉغلان بېگم نینگ بو سۉزلریدن خۉشی کېلیب  یواشگینه میلی، بۉلیبدی دېب قۉییبدی.

کل اۉغلان قیشلاغیگه کېتیب آنه سیگه بۉلگن حادثه نی ایتیب بېریبدی.

کل اۉغلیم جانیم اۉغلیم بیز کمبغل اولر پادشاه، اولر بیزلرنی تېنگیمیز اېمس دېبدی. کل اۉغلان اېسه آنه سینی راضی قیلیب پادشاه نینگ سراییگه آلیب باریبدی.آنه سینی بېگم نینگ عاېله سی بیلن تانیشتیریبدی.

کل اۉغلان بیلن پادشاه نینگ قیزی بېگم تۉی قیلیب گوزل بیر سرایگه یېرله شیب حیات کېچیریش ده دوام اېتیبدیلر و کل اۉغلان هم مرادیگه یېتیبدی.